ബെംഗളൂരുവിൽ വീട് വാങ്ങണോ? മികച്ച 7 നിക്ഷേപ ഇടങ്ങൾ ഇതാ!

ഇന്ത്യയുടെ ഐടി തലസ്ഥാനമായ ബെംഗളൂരു ഇന്ന് ലോകശ്രദ്ധയാകർഷിക്കുന്ന മെട്രോ നഗരമായി അതിവേഗം വളരുകയാണ്. അടിസ്ഥാന സൗകര്യങ്ങളിലെ വിപ്ലവകരമായ മാറ്റങ്ങൾ, മെട്രോ ശൃംഖലയുടെ വ്യാപനം, അന്താരാഷ്ട്ര വിമാനത്താവളം, പ്രമുഖ കമ്പനികളുടെ സാന്നിധ്യം എന്നിവ നഗരത്തെ ഒരു നിക്ഷേപ സൗഹൃദ കേന്ദ്രമാക്കി മാറ്റിയിരിക്കുന്നു. ഈ വളർച്ചയുടെ ഭാഗമാകാൻ ആഗ്രഹിക്കുന്നവർക്കായി ബെംഗളൂരുവിലെ മികച്ച റിയൽ എസ്റ്റേറ്റ് മേഖലകളെ പരിചയപ്പെടാം.

സർജാപൂർ റോഡ്: ഐടി പ്രൊഫഷണലുകളുടെ പ്രിയകേന്ദ്രം

കിഴക്കൻ ബെംഗളൂരുവിൽ വമ്പിച്ച മാറ്റങ്ങൾക്കാണ് സർജാപൂർ റോഡ് സാക്ഷ്യം വഹിക്കുന്നത്. വൈറ്റ്ഫീൽഡ്, ഇലക്ട്രോണിക് സിറ്റി തുടങ്ങിയ പ്രധാന കേന്ദ്രങ്ങളുമായുള്ള എളുപ്പത്തിലുള്ള കണക്റ്റിവിറ്റിയാണ് ഇതിന്റെ പ്രധാന ആകർഷണം. വരാനിരിക്കുന്ന പെരിഫറൽ റിങ് റോഡ്, മെട്രോ റെയിൽ പദ്ധതികൾ എന്നിവ ഈ പ്രദേശത്തിന്റെ മൂല്യം ഇനിയും വർദ്ധിപ്പിക്കും. വിദ്യാഭ്യാസ സ്ഥാപനങ്ങളുടെയും ടെക് പാർക്കുകളുടെയും സാമീപ്യം ഇവിടെ താമസം തുടങ്ങാൻ ആഗ്രഹിക്കുന്നവർക്ക് വലിയ നേട്ടമാണ്.

Mahadev Ittina/unsplash

ഇന്ദിരാ നഗർ: ആധുനികതയും പച്ചപ്പും ഒത്തുചേരുന്ന ഇടം

നഗരത്തിന്റെ ഹൃദയഭാഗത്ത് സ്ഥിതി ചെയ്യുന്ന ഇന്ദിരാ നഗർ എന്നും പ്രീമിയം ലിസ്റ്റിലാണ്. പച്ചപ്പും തിരക്കേറിയ നഗരജീവിതവും ഒരുപോലെ ആസ്വദിക്കാൻ കഴിയുന്ന ഇവിടം മികച്ചൊരു സാമ്പത്തിക കേന്ദ്രം കൂടിയാണ്. ഹൗസിംഗ് മേഖലയിലും കോ-വർക്കിംഗ് സ്പേസുകളിലും ഇന്ദിരാ നഗർ വലിയ മുന്നേറ്റമാണ് നടത്തുന്നത്.

ഹെന്നൂർ റോഡ്: ഭാവിയിലേക്കുള്ള മികച്ച നിക്ഷേപം

വടക്കൻ ബെംഗളൂരുവിൽ നിക്ഷേപത്തിന് ഏറ്റവും അനുയോജ്യമായ സ്ഥലങ്ങളിലൊന്നാണ് ഹെന്നൂർ റോഡ്. വിമാനത്താവളത്തിലേക്കുള്ള എളുപ്പവഴിയും മാന്യത ടെക് പാർക്കിന്റെ സാമീപ്യവുമാണ് ഈ പ്രദേശത്തിന്റെ വികസനത്തിന് ആക്കം കൂട്ടിയത്. മികച്ച അപ്പാർട്ട്മെന്റ് സമുച്ചയങ്ങളും ഷോപ്പിംഗ് മാളുകളും ഇവിടെ ധാരാളമായി ഉയരുന്നുണ്ട്.

യെലഹങ്ക:വ്യോമയാന നഗരത്തോടടുത്ത്

അന്താരാഷ്ട്ര വിമാനത്താവളത്തിനടുത്തുള്ള യെലഹങ്ക, വില്ലകളും പ്ലോട്ടുകളും വാങ്ങാൻ ആഗ്രഹിക്കുന്നവർക്ക് മികച്ച ഓപ്ഷനാണ്. ഐടി പാർക്കുകളും മികച്ച റോഡ് സൗകര്യങ്ങളും ഇവിടുത്തെ റിയൽ എസ്റ്റേറ്റ് ഡിമാൻഡ് വർദ്ധിപ്പിക്കുന്നു.

അത്തിബെലെ: ലാഭകരമായ നിക്ഷേപം കുറഞ്ഞ ചിലവിൽ

തെക്കൻ ബെംഗളൂരുവിൽ ഇലക്ട്രോണിക് സിറ്റിക്ക് സമീപം സ്ഥിതി ചെയ്യുന്ന അത്തിബെലെ, ബജറ്റ് സൗഹൃദ നിക്ഷേപകർക്ക് യോജിച്ചതാണ്. കഴിഞ്ഞ വർഷങ്ങളിൽ ഇവിടുത്തെ ഭൂമിവിലയിൽ വലിയ വർദ്ധനവുണ്ടായിട്ടുണ്ട്. ഐടി, ബയോടെക് കമ്പനികളിലേക്കുള്ള പ്രവേശനക്ഷമത ഇവിടുത്തെ പ്രത്യേകതയാണ്.

കെആർ പുരം & ഇലക്ട്രോണിക് സിറ്റി ഫേസ് 2

വാടകയ്ക്ക് വീട് അന്വേഷിക്കുന്നവർക്കും അപ്പാർട്ട്മെന്റ് വാങ്ങാൻ ആഗ്രഹിക്കുന്നവർക്കും കെആർ പുരം മികച്ച ചോയിസാണ്. മെട്രോ സൗകര്യം യാത്രകൾ എളുപ്പമാക്കുന്നു. ഇലക്ട്രോണിക് സിറ്റി ഫേസ് 2 ആകട്ടെ, ടെക് മേഖലയിൽ ജോലി ചെയ്യുന്നവർക്ക് ഏറ്റവും അനുയോജ്യമായ താമസസ്ഥലമാണ്. ഭാവിയിൽ വലിയ ലാഭം വാഗ്ദാനം ചെയ്യുന്ന നിക്ഷേപ മേഖലയാണിത്.